Тарақаннан қалай құтыламыз?

Біз қалада жеке секторда тұрамыз. Соңғы кездері үйде тарақан көбе­йіп кетті. Тарақанға қарсы қандай улағыш дәрілер қолдануға болады?
Тамара, Талдықорған қаласы
К.КАРДАСИНОВ, «Санитарлық-эпидемиологиялық сараптама және мониторинг ғылыми-тәжірибелік орталығы» РМҚК маманы:
– Тарақандар көбінесе қоқыс арасында тіршілік етеді. Әртүрлі жолдармен тұрғын үйлерге ауысады. Бөлмеде ашық қалған тағамдарды жеп, ауру тудыратын микроорганизмдерді тасымалдайды.
Зияндылығы: тарақандар тері қа­бат­тарын кеміріп, ыдырау өнімдері­мен ластап, гельминттердің, ішек ауруын қоздыратын қарапайым цисталарын, басқа жұқпалы ішек инфекцияларының қоздырғыштарын жұқтырады.
Тарақандардың ішегінде тырысқақ вибриондары 75 сағаттан 15 күнге де­йін тіршілігін сақтай алады. Олар дизентерия микробын да таратады, дизентерия микробы 10 күнге дейін тіршілігін жоймай сақталады, тіпті іш сүзегінің таяқшалары да екі-үш күнге дейін тара­қандар ішегінде өлмей, індеттің таралуына себепкер болады.
Сонымен қатар тарақандар әртүрлі инфекциялық және инвазиялық ауру­лар­дың қоздырғыштарын – іш сүзегі, па­расүзек, жерше, күл, туберкулез таяқ­шала­рын таратушылар болып табылады
Тарақандармен күресу үшін инсектицидтер қолданылады.
Қазіргі уақытта біздің елде тіркелген тарақандарға қарсы қолданатын дезин­секциялық дәрілер бар. Олар: Сольфак EW 050 – майлы-сулы эмульсия, Сольфак WP 10 – ылғалдандырылған ұнтақ, Байтекс ЕС-50 – концентратты эмульсия, Сенузан 48% – концентрат, Фуфанон – концентрат, Суматион НП 27,5% – концентратты эмульсия, Альфатрин – ылғалдандырылған ұнтақ, Дезар дуст – ұнтақ, Бриз 25% – сұйықтық.