Таяу Шығыстағы толқулар әлемдік туризмге кері әсер еткен жоқ
Таяу Шығыс пен араб дүниесіндегі толқулар мен тәртіпсіздіктер әлемдегі туризмге кері әсер етті ме?
Жәнібек Қайыржанов, Алматы облысы
Бүкіләлемдік туристік ұйымның баяндамасына сенсек, Таяу Шығыс пен Солтүстік Африкадағы оқиғалар әлемдегі туризм көлемінің өсуіне кедергі болған жоқ. 2011 жылдың алғашқы айлары әлемнің туристік аймақтары үшін табысты болған. Әсіресе Оңтүстік Америка мен Оңтүстік-Шығыс Азия елдерінде өсім 15 пайызды құраған. Оңтүстік Африкада 13 пайыз, Орталық және Шығыс Еуропада 12 пайызға артқан. Биылғы жылдың қаңтар-ақпан айларында туристер 124 млн адамға жеткен, былтыр бұл көрсеткіш 119 млн болған еді. UNWTO ақпаратына сәйкес, туризмнің өсімі дамыған елдерге қарағанда (+4%) дамушы елдерде (+6%) жоғарырақ. Әлемдік туризмнің 2010 жылғы жалпы табысы 919 млрд долларға жеткен, ал 2009 жылы бұл 851 млрд долларды құраған болатын. Шетелдік туристерді қабылдау жөнінен Қытай Испанияны жолда қалдырып, АҚШ пен Франциядан кейінгі үздік үштікті түйіндеді. Туризмнен түсетін табыс жөнінен АҚШ көш бастаса, әлемдегі туристік елдер рейтингінде Франция жетекшілікті сақтап келеді.
