ШЫҰ-ның штаб пәтері қайда?

Аймақтағы алты мемлекет мүше болып табылатын Шанхай ынтымақтастық ұйымының штаб пәтері қай қалада орналасқан және ұйымның саммиттері қандай қалаларда ұйымдастырылған?
Ерболат САЛЫҚБАЙ, Астана

Аймақтағы ең беделді ұйымдардың бірі – Шанхай ынтымақтастық ұйымының ортақ штаб пәтері жоқ. Яғни құрылымдық кеңселері әр мемлекетте орналасқан. Ұйымның хатшылығы Қытай астанасы Бейжің қаласында болса, Іскерлік кеңесі Ресейдің орталығы Мәскеуде шоғырланған. ШЫҰ-ның аймақтық лаңкестікке қарсы құрылымының бас кеңсесі Өзбекстанның елордасы Ташкент қаласында. Ал енді іргелі ұйымның саммиттеріне келер болсақ, осы уақытқа дейін мүше мемлекеттердің басшылары 10 рет бас қосты. ШЫҰ құрылған Шанхай қаласында 2001 және 2006 жылдары ұйымдастырылса, Ресейдің үш бірдей қаласында мемлекет басшылары бас қосыпты. Олар: Санкт-Петербург (2002), Мәскеу (2003) және Екатеринбург (2009). Ташкентте 2004 жылы және биыл өткізілді. Ал Астана (2005), Бішкек (2007) және Душанбе (2008) қалалары бір мәрте ұйымның саммитін шақырды.