Судың бағасы қымбаттай ма?
Жақын күндері суға жаңа тарифтік жүйе енгізіледі деп естідім. Бұл қандай жүйе? Ерекшелігі неде? Жаңа жүйе республиканың барлық облыстарына бірден енгізіле ме?
Самал Қайратова, Алматы қаласы
Суға қатысты жаңа жүйе – дефференциалды тариф деп аталады. Жаңа жүйе 1 тамыздан бастап Астана қаласында енгізіледі. Ал уақыт өте республикамыздың басқа да аймақтарын қамтиды деп күтілуде. Жаңа жүйенің ерекшелігі – суды тұтынушыларды бірнеше топқа бөледі. Атап айтқанда, жүйеге сәйкес, суды тұтынушылар қарапайым тұрғындар, заңды тұлғалар және электр қуатын жеткізуші мекемелер болып үш топқа бөлінеді. Қазіргі тариф бойынша бұлардың барлығы судың бір текше метріне 25 теңге 50 тиын төлеп отыр. Ал 1 тамыздан бастап қарапайым тұрғындардан басқалар үшін судың құны екі есеге қымбаттайды. Бұдан былай жылу мен электр қуатын өндіруші мекемелер суға 40 теңге шамасында төлейтін болса, ең үлкен тариф – таза ауызсуды техникалық мақсаттарда қолданып отырған бизнес өкілдеріне тағайындалады. Олар үшін су ақысы қымбатырақ. Яғни 1 тамыздан бастап Астанадағы хауызы, моншасы, көлік жуу орындары бар азаматтар судың бір текше метріне 25 теңге емес, 63 теңге төлеуге міндетті.
