Шоқан туралы қандай кітап шықты?

Халқымыздың жарық жұлдызы, ағартушы ғалым Шоқан Уәлиханов туралы 10 томдық жинақ шықты деп естіп едім. Шығарманың авторы кім, шоқантану ғылымына бұл еңбектің қосар үлесі қандай?
Марат ЖАНДӘУЛЕТҰЛЫ, Талғар
Қазақтың ұлы ғалымы, ағартушы, шығыстанушы, та­рих­шы, этнолог, географ, фольклортанушы Шоқан Уә­ли­ханов жайында қанша еңбек жазылса да артық емес. Жақында жарық көрген «Шоқан сагасы» атты зерттеулер жинағы да – шоқантану ғылымына қосыл­ған бір сүбелі үлес. Шығарма авторы – Біріккен Ұлт­тар Ұйымы Адам құқығы комитетінің кеңесшісі, «Бей­біт­шілік әлемі» халық­аралық қазақ шығарма­шы­лық бірлестігінің президенті Әбен (Әбдіәлі) Нұр­ма­нов. Автордың айтуынша, әйгілі ғалымның туып-өс­кен, оқыған, қызмет істеген, жүріп өт­кен жерлеріне экс­педиция жұмыстары 1972 жылы бас­талған. 1989 жылға дейін автор бұл іспен жалғыз айна­лыс­қан. 10 жылдық үзілістен кейін 2000 жылдан қайта басталған экпедиция құрамына өзге де адамдар енген.
Ә.Нұрманов шоқантанушылардың осы уақытқа дейін жарық көрген жүздеген еңбегімен және ғалым­ның ғылыми мұрасына арналған 150-ден астам ғы­лы­ми-кон­ференцияның материалдары­мен таны­сып шық­қан. Содан кейін оның өмірін ең­бек­тері ар­қы­лы ашуға тырысып, бұған дейін белгісіз және кү­мән­ді болып келген бірқатар жайттың жай-жапсарын ашу­ға қол жеткізген. Автордың пікірінше, жинақта 50-ге жуық тың жаңалық ашылып отыр.