«Саммит» термині қашан пайда болды?
Бүгін-ертең Астана қаласында Еуропадағы қауіпсіздік және ынтымақтастық ұйымының кезекті саммиті өтетіні белгілі. Жалпы, осы «саммит» термині бұрын-соңды қолданылмаған деген пікір бар. Аталған термин қай кезден бастап қолданылып келеді?
Мақпал СЕЙФОЛЛА, Павлодар
Summit деген ағылшын сөзінің аудармасы «жоғары деңгейдегі кездесу» дегенге саяды. Президенттер немесе Үкімет басшылары деңгейіндегі кездесулер осылай деп аталады. Иә, «саммит» термині біздің лексиконымызда 1980 жылдардың екінші жартысынан бастап қолданылып келеді. М.Горбачевтің жариялылық саясаты жүргізілгенше, мұндай жүздесулер «жоғары деңгейдегі кездесу» деп қана айтылатын. Алғашында бұл термин тек қана КСРО мен АҚШ президенттерінің кездесулері кезінде ғана қолданылып жүрді. Көршілес Ресейде Владимир Путиннің басшылығы кезінде арнайы президенттің жарлығы шығып, аталған термин лексиконға енгізілген екен.
