Раушан гүлі ерлердің символы ма?

Раушан гүлін кейбір халықтар «ерлердің символы» деп танитын көрінеді. Ал әнші Роза Рымбаева бұл гүлді өзінің қастерлі нышаны санайды. Негізі, символикада раушан гүлі қандай ұғымды білдіреді?
Анар СЕРҒАЗИНА, Астана қаласы
Ежелгі дәуірлерден жеткен тарихи жәдігерлерге қарағанда, раушан гүлі араб елдерінде ерлер көрік-келбетінің символы болып есептеледі. Хош иісті бұл гүл көне замандарда, шынымен де, ер адамдар мен олардың басты қасиеттерін меңзейтін болған. Ежелгі римдіктердің ұғымында рау­­шан гүлі құпия, жұмбақ нәрселерді біл­дір­ген. Sub rosa dictum деген мәтел со­дан қал­ған, «раушан астына жасырылған» деп қазақшаланатын бұл тіркес айтуға болмай­тын нәрселерді меңзегенде қол­данылады. Ортағасырларда неміс жерінде құрылған Розенкрейцерлер діни-мисти­калық қоғамы креске таңылған раушан гүлін өз төсбел­гілері санаған. Раушан гүлі бір халықтарда соғыстың символы деп те есептелген. Ал Еуразия халықтарында алқызыл раушанды махаббаттағы іңкәр­ліктің, ақ раушанды пәктіктің, сары рау­шанды суынудың белгісі деп түсіну қалып­тасқан. Раушан гүлінің 32 жапырақшалы күйінде суреттелуі класси­калық бейне деп саналады.