Қызыл түсті банан да болады
Естуімше, банан жемісінің тек сары ғана емес, қызыл түрі де болады екен. Біздің елге банан, негізінен, қай елдерден әкелінеді?
Әли Беков, Алматы қаласы
Банан қатты өзексіз өсімдіктердің ең ірісі саналады. Банан шөбінің биіктігі 10 метрге, диаметрі 40 сантиметрге дейін барады. Бір түпте салмағы 500 келі болатындай 300 жеміс өседі. Сіздің айтып отырғаныңыз дұрыс, бананның тек сары түсі ғана емес, қызыл, қара түсі де кездеседі. Қызыл және қара банан өте жұмсақ, нәзік болғандықтан, тасымалды көтере алмайды. Түрлі-түсті банандар тек Сейшельдегі Мао аралында ғана өседі. Жергілікті тұрғындар бұл жемісті шаян, моллюскілерге қосымша тағам ретінде пайдаланады. Бананның отаны – Оңтүстік Шығыс Азия. Бұл жемісте басқа жемістерге қарағанда адамның көңіл-күйін көтеруге септігін тигізетін B6 дәрумені мол. Бүгінде бананды ең көп өсіретін мемлекеттер – Бразилия мен Үндістан. Банан картоптан бір жарым есе құнарлы екен. Ал кептірілген бананның калориясы бес есеге көп. Бір бананда 300 мг калий бар, бұл адамның қан қысымының көтерілмеуіне әсер етіп, жүрек қызметін жақсартады. Латын тілінде "musa sapientum" деп аталатын банан жемісі «даналық жемісі» деген мағына береді.
