Жыл құстарына арналған арнайы күн бар деп естіп едім. Нақтылап бере аласыздар ма?
Толқын РАБАТҚЫЗЫ, Қызылорда
Жыл құстарының бүкіләлемдік күндері жыл сайын 9-10 мамыр күндері аралығында атап өтіледі. Алайда бұл атаулы күн көптеген мемлекеттерде елеусіз болып келеді. Жалпы, құстар тіршілігі – бүкіл өсімдіктер мен жануарлардың биологиялық әралуан саласындағы жағдайлар мен үрдістер туралы пікір түюге мүмкіндік беретін үлгілі көрсеткіш. Қоршаған ортаның өзгерістерін саралау жұмыстарын жүргізгенде құстарды бақылау ерекше маңызды, өйткені оларды планетамыздың барлық экологиялық жүйесінен кездестіре аламыз.
Бүкіләлемдік жыл құстары күні алғашқы рет осыдан төрт жыл бұрын Африка-еуразиялық жыл құстары келісімі (САЕВП) және Көші-қон жануарлары конвенциясы (КМЖ) хатшыларының бастамасымен атап өткізілген. Бұл атаулы күн – бүгінгі уақытта құстарға деген қамқорлықты арттыру және оларды қорғау мақсатында белгіленген. Орнитолог мамандардың пікірінше, құстар проблемасын әлем халықтары бірлесіп шешуі тиіс. Әсіресе, жыл құстары – белгілі бір мемлекеттің меншігі ретінде танылмайтын, баршаға ортақ жаратылыс иесі. Өйткені олар үшін ешқандай да шекара жоқ. Осы орайда мамандар «жыл құстарын қорғайтын міндетті адамдардың іс-қимылын арнайы жоспарлау қажет» дейді.