Елімізде классикалық музыканы орындайтын өнер ұжымдары санаулы ғана. Соның ішінде шоқтығы биіктерінің бірі – көбіне шетелдерде өнер көрсетіп жүретін «Қазақстан камератасы» оркестрі. Бұл ұжым қашан құрылған? Айдос ПЕРНЕБЕК, Тараз қаласы
«Қазақстан камератасы» мемлекеттік камералық оркестрі 1997 жылы құрылды. Топты құру идеясы ҚР халық әртісі, профессор, дарынды скрипкашы Гаухар Мұрзабековаға тиесілі. Оркестр құрамының дені – Халықаралық және республикалық байқаулардың лауреаттары, жас музыканттар. Өнер ұжымы кәсіби біліктіліктің арқасында Қазақстанда ғана емес, көптеген шетелдерде де талғампаз тыңдарманның құрмет-қошеметіне бөленіп жүр. «Қазақстан камератасы» гастрольдерінің географиясы Ұлыбритания, Франция, Германия, Италия, Чех Республикасы, Венгрия, Словакия, Түркия, Македония, Ресей сынды мемлекеттерді қамтиды.
Оркестрдің халықаралық жолсапарларының мақсаты – қазақ композиторлары шығармаларын өзге елдерде насихаттап дәріптеу, шетел дирижерлері және солистерінің ұжымдарымен бірлесіп концерттер өткізу және беделді халықаралық фестивальдерге қатысу.
2006 жылы «Қазақстан камератасы» орындаған классикалық шығармалардың компакт-дискісі жарық көрген.