Қазақ қуыршақ театрын шетел көрген бе?

Елімізде қуыршақ театры бар екенін білеміз, бірақ солардың нақты нендей туынды ұсынатынын білмейді екенбіз. Шетелге шыға ма?
Бейбіт Көбеев, Талдықорған
Әрине, елімізде қуыршақ теа­тры­ның бір емес, бірнешеуі бар. Таяуда Алматы мемлекеттік қуыршақ театры Жапонияда өткен Иида қуыршақтар фестиваліне қатысып, онда қазақтың халық ертегісі «Қаңбақ шалды» көрсетіп қайтты. Фестивальға Швеция, Дания, Чехия, Тайвань секілді әлем елдері қатысты. Атап айтарлығы, «Қаңбақ шал» қо­йы­лымы 2010 жылы Прага қала­сында өткен Бүкіләлемдік қуыршақ өнері фестивалінде «Ең үздік театрлық декорация және қуыршақ дизайны» номинациясы бойынша бас жүлдені иеленген болатын.
Ал Иида қуыршақтар фестивалі алғаш 1979 жылы тұңғыш рет Балалардың халықаралық жылының құрметіне ұйымдастырылған еді. Содан бері онда 400-дей қойылым тұсауын кесіп, 40 мыңға жуық көрермен жиналыпты.