Қазақ партизандары кімдер?

Ұлы Отан соғысы жылдарында жау тылында дұшпанды тас-талқан қылған қазақ партизандары кімдер болды?
Мейірбек, Алматы облысы
Қазақ жауынгерлері жау уақытша басып алған аумақтардағы партизандық қозғалысқа қатысты. Украинаның партизандық құрамалары мен отрядтарында 1500, Ленинград облысында 220-дан астам қазақ шайқасты (толық емес деректер бойынша). Смоленск облысындағы 15 партизан бригадасы мен отрядында 270 қазақстандық ұрыстарға қатысты. Белоруссияның әртүрлі аймақ­тарында әрекет еткен 65 партизан брига­дасы мен отрядының құрамында 1500-ден аса қазақстандық болды. Соғыс жылдары партизан қозғалысына қатынасқан қазақстандықтардың саны 3,5 мыңға жетті. Партизандық қозғалыстың Ғалым Ахмедия­ров, Ғалым Омаров, Нұрым Сады­қов, Қасым Қай­се­нов, Нұрым Сыздықов, Әди Шәріпов, Тәжіғали Жангелдин т. б. батырла­рының есімі көпке таныл­ды. Халық кекшілдерінің қата­рын­да қазақстандық әйелдер – Нұрғаным Байсейі­това, Тұрғаш Жұма­баева, Жамал Ақәділова тағы басқалар аянбай шайқасты. Еуропа елдерінде Қарсы­ласу қозғалы­сына қатысушы қазақстан­дықтар фашис­терге қарсы күресте батырлық пен ерлік көрсетті. Поляк партизандық жасақтарында Салтынбек Төлешов, Константин Трокин, Михаил Авдейчик, Омар Тойым­бетов тағы басқалары шай­қасты. Словакия, Югославия, Грекияда, Бельгия­да қазақ жерінен шыққан сарбаздар жаудың үрейін ұшырып, Жеңісті жақындатуға зор үлес қосты.