Қазақ гүлдері қайда?
Қайда барсақ, Голландиядан, Германиядан әкелінген гүлдер деп жатады. Қазақстанда гүл өсіретін жылыжайлар қалды ма өзі?
Еркін ОМАРОВ, Талғар
Бұл сауалды Mercur Dom ltd директорының орынбасары Амангелді Ержановқа жолдадық. – Қазақстанда сатылатын гүлдердің 25 пайызы өз жерімізде өсіріледі, қалғанын импорт құрайды. Алматы маңында екі, Текелі мен Степногорскіде бір-бірден жылыжайлар бар. Біздің кәсіпорын былтыр 1 млн 200 мың тал раушангүл, 900 мың тал гербера өсірдік. Жыл бойғы сатылымның 50 пайызы әйелдер мерекесі кезінде жасалады, одан кейінгі орында – алғашқы және соңғы қоңыраулар. Биыл тапсырыс берушілердің сұранысына қарағанда, гүл былтырғыдан көбірек сатылып жатқан сияқты. Былтыр 8 Наурыз қарсаңында таңертеңгісін 4500 тал раушангүл кесетінбіз, биыл 7000 данасын өткізіп жатырмыз. Қазақстанда өсірілген гүлдердің бойы 40 сантиметрден, импорт тауары бойшаңырақ, 60-80 сантиметрден басталады. Бірақ менің пікірімше, біздің гүлдер ұзағырақ сақталады әрі иісі табиғи.
