Қастеевтің ұстазы кім?

Әбілхан Қастеевтің арнайы кәсіби білім алмағаны белгілі. Алайда үлгі тұтқан ұстаздары болған шығар?
Жауһар ОРДАБАЙ, Алматы
Әбілхан Қастеевтің ең үлкен ұстазы – өмір. Оның ішіне туған жері, ауыл-аймағы, ата-анасы, ата-бабасы, жалпы, қазақтың жалпақ даласы – бәрі кіреді. Ол – көрген-білгенінен, естігенінен, азды-көпті оқығанынан ой түйген, өнер үйренген адам. Орыс суретшісі Н.Хлу­дов «Сурет салуды қайдан үйрендің?» деп сұрағанда бозбала Әбілхан «Таудың бұла­ғынан, қойдың құлағынан, апамның киізінен, ешкінің мүйізінен үйрендім» деп жауап бер­ген екен. Одан кейін суретші, әрине, Хлудовтан тәлім алған және Хлудовқа өзі де көп нәрсе үйреткен, яғни ұстазының өзіне ұстаз­дық жасаған. Мысалы, А.Байтұрсыновтың «Орындалуы мен бейнелеп мазмұндауы жағы­нан Хлудовтың картиналары әдемі-ақ, бірақ қазақ тұрмысын білетін адам олардың ойдан шығарылған, жат әрі жалған екенін аңғарады» деген сөзіне орай Н.Хлудов «Ол кар­тиналарды түзету үшін Қазақстанның байыр­ғы халқынан шыққан Ходжиковке, Қас­теевке жөндеуге беру керек» депті. Өз жазбаларына қарағанда, Хлудовтың Қастеевті қазақ ауы­лы­ның тұрмыс жағдайын, күнделікті тір­шілігін өзінен тәуір біледі деп мойындағаны, яғни оны тыңда­ғаны аңғарылады.