Кейбір косметикалық бұйымдар сымбатты көрінуге жол ашқанмен, оларды сатып алуға кез келгеннің қалтасы көтере бермейді. Бірақ, косметикалық бұйымдардан кем болмайтын әрі қолжетімді бағамен сатылатын қарамайлы сабынның теріге пайдасы көп дейді косметолог мамандар.
Қазіргі таңда бұл сабынға сұраныс көп. Себебі қарамайлы сабынның 90%-ы жәй сабыннан, ал 10%-ы қайың қарамайынан тұрады. Емдік қасиеттерге бай қайың қарамайы псориаз, дерматит, сүйел т.с.с. тері ауруларының алдын алып, бактерияларға төтеп береді. Қайың қарамайы терідегі сызаттардың болмауына, жарақаттардың жазылуына ықпал етіп, теріні күйік шалғанда да көмекке келеді. Беттегі қара дақтар мен безеулерден арылам десеңіз, тұрақты түрде қарамайлы сабынды қолданған жөн.
Қарамайлы сабынның иісі жағымсыз келгенмен құрамындағы табиғи құрамдас бөліктері теріні қатайтып, нәрлендіреді.
Сондай-ақ, бұл сабын тері ауруларына ғана емес, шаш күтіміне де пайдасы зор. Қайызғақтан арылуға, шаштың ұштануы мен түсуінен сақтайды. Бас терісін қатайтып, шаштың өсіміне оң әсерін тигізеді.
Айта кететіні, сабын барлық тері түріне арналған. Әсіресе, құрғақ теріге пайдасы көп. Алайда, бұл сабынды жаз мезгілінде қолданғаннан гөрі, қыс мезгілінде жиі пайдаланған дұрыс. Себебі, сабын қыста теріні суық-аяздан сақтай алады. Ал, жаз мезгілінде сирек қолданудың себебі аптап ыстықта тері майлы болғандықтан, оны аптасына екі рет қана қолдану керек.
baq.kz