Қаңтар айының атауы қайдан шыққан?

Қазақтың әрбір сөзінің терең мән-мағынасы бары белгілі. Мені қаңтар айының атауы қайдан шыққаны қызықтырады. «Қаңтар» атауы қайдан шыққан?
Бейбіт ҚАЗАҚБАЙ, Солтүстік Қазақстан облысы
Ежелгі түркі күнтізбесіндегі реттік айлар мен мүшелдік айлардың аттары сол айлардың жыл ішіндегі орындарына бай­ланысты түсіндіріледі. Мысалы, байырғы қазақ күнтізбесіндегі тоғыс айларының аттары Үркерді әр жаңа­сын­дағы Айдың «басып өткендігіне» қарай айтылса, жұл­дыз айларының аттары шоқжұлдыздардың атауларынан шығады. Ал азаматтық ай аттарын тіл білімі тұрғысынан профессор Нұргелді Уәлиұлы талдаған болатын. Оның мәліметінше, қаңтар – күннің қаңта­рылып байланып, одан әрі тұқырып, қысқара алмайтын айы. Қаңтарулы ат басы­ның жерге жетпейтіні сияқты қаңтар­дағы күн көзі де одан әрі төмен­деп, көк­жиекке жақындай алмайды. Ғасырлар бойы аспанды бақылап, жазық далада өмір сүрген қазақ халқы күн қозғалысының бұл ерекшелігін ерте кезден-ақ аңғарған. Соған орай қыстың қаңтарылып тұрған кезін «қаң­тар айы» деп атаған.