Қайызғақтан қалай құтылсам болады?
Шашымды арнайы шампуньмен жусам да, қайызғақтан құтыла алмадым. Қайызғақтан құтылудың халықтық емі бар ма?
Тамара Амирова, Павлодар қаласы
Шашыңыздағы қайызғақтан құтыла алмай жүрсеңіз, төмендегідей тәсілдерді қолданыңыз:
1. Шашты сулап, ұшына дейін айран жағып, 30 минут күтіңіз. Содан кейін шашыңыздан айран иісі шықпас үшін бір литр суға төрт ас қасық қыша (горчица) салып, шашты шаю керек. Келесі кезекте бір литр суға төрт ас қасық қыша мен төрт ас қасық ас содасын салып, мұқият араластырып, дайын болған тұнбамен шашыңызды жуыңыз. Соңынан бір литр жылы суға, екі-үш тамшы сірке суын қосып, шашыңызды қайта шайыңыз. Қайызғақтан арылып, шашыңыз сусылдап тұрады.
2. Түймедақтың төрт қасығын 1,5 литр суға салып, бес минут қайнатып, сүзіп аласыз. Әуелі шашты жақсылап иіс сабынмен жуып алып, сүзіп алынған тұнбамен жуу керек. Нәтижесінде шаштың әрі қайызғағы кетеді, әрі шашыңыз сары алтын түске боялады.
