Президент кубогы қашан өтеді?

Жыл сайын осы мезгілде футболдан Президент кубогы дәстүрлі халықаралық турнирі өтіп тұрушы еді. Биыл бұл туралы ақпараттарды әлі естімедім. Жалпы, дәстүрге айналған бұл дода биыл ұйымдастырыла ма?
Жанбота ОРАЛБЕК, Алматы қаласы
2008 жылдан бері ұйымдастырылып келе жатқан бұл турнир биыл да жалғасын таппақ. Дүбірлі дода сәуірдің 26-сы мен 30-ы аралығында елордамыз Аста­наның «Астана-Арена» стадионында өтеді. Бірақ биыл турнирге әдеттегідей клубтық команда­лар емес, жасөспірімдер құрамалары қатыспақ. Қазақ­стан намысын бұл сында 17 жасқа дейінгі жас­өс­пірімдер құрамасы қорғайды. Яғни «Президент кубогы» халықаралық турнирі неміс маманы Оливер Пельцер үшін Қазақстан жасөспірімдер құра­масының жаттықтыруындағы алғашқы бапкерлік сынақ болмақ. Сондай-ақ Қазақстаннан бөлек, аталмыш додаға жеті ел қатысуға ниет білдірді. Олар: Өзбекстан, Әзірбайжан, Иран, Түркия, Украина, Грузия және Армения. Қазақстан жасөспірімдері Өзбекстан, Әзір­байжан, Иран құрамаларымен бірге «А» тобына түсті.
Айта кетейік, өз тобында үздік шыққандар фи­нал­дық жұпты құраса, тобында екінші орын алған­дар тур­нирдің қола жүлдесіне таласады. Сол сияқты топ­та үшін­ші орын алғандар бесінші орынға таласса, өз топ­тары­ның аутсайдерлері жетінші орын үшін текетіреседі.