Педикулез деген қандай ауру?

Таяуда «балалар арасында педикулез ауруы анықталды» дегенді естідім. Осы жайлы толығырақ білгім келеді. Бұл қандай ауру және оның алдын алу жолдары қандай?
Дариға САҚАНОВА, Алматы

Алматы қаласы Жетісу ауданы бойынша МСЭҚБ эпидемиология бөлімінің жетекші маманы Ф.Қ.Құтбаева:
– Педикулез – (латын тілінен алғанда, рediculus humanus адам биті деген мағынаны білдіреді), биттердің адам денесінде паразиттенуі. Педикулез ауруының таралуына көп жағдайда әлеуметтік факторлардың айқын маңызы бар. Ауру ошақтары жеке бас гигиенасының қарапайым ережелерін сақтамау салдарынан пайда болады. Бит індеті бөртпе сүзек, қайталама сүзек сияқты және т.б. қауіпті жұқпалы аурулардың потенциалды жұқтырушысы болып табылады.
Биттер әдетте биттеген адамдармен байланыста болғанда, көбінесе балалар арасында ұжымдық қатынаста болғанда, көлікте адамдармен жақын қатынаста болғанда, киімді, төсек-орын жабдықтарын, әжетхана заттарын (тарақ, щётка және т.б.) ортақ пайдаланғанда жұғады. Педикулез ауруын жұқтыру қаупі көбінесе мектеп жасына дейінгі және мектеп жасындағы, яғни ұжымдардағы, көп адамдармен қатынаста болатын балаларда, сонымен қатар халықтың әлеуметтік халі нашар топтарда (тұрақты мекенжайы жоқ адамдар т.б. адамдар тобы) тіркеледі.
Педикулез ауруымен күресте алдын алу шаралары, негізінен, жеке бас гигиенасы ережелерін сақтау болып табылады. Бит табылған жағдайда дәріханаларда сатылатын арнайы педикулез ауруларына қарсы жабдықтарды қолдану арқылы денеде, киімде, ішкиімде, басқа да заттар мен нәрселерде санитариялық өңдеу жүргізу қажет.
Ал биттегендік жағдайы бір адамның өзінен көптеп табылған жағдайда, қалалық залалсыздандыру стансасында, яғни мына мекенжай бойынша – Азов көшесі №17 үйде биттен тазалайтын өткізгіш кабинеті орналасқан. Ол жерде ақысыз өңдеу жасатуға, сонымен қатар ішкиімді, киімдер мен төсек-орын жабдықтарын камералық өңдеуден өткізуге болады.