Музыка тілінде «пассаж» деген термин бар. Осы терминді жан-жақты түсіндіріп берсеңіздер.
Егер сіз шебер музыканттардың аспапта ойнағанын жиі тыңдайтын болсаңыз, олардың өзіндік аспапта ойнау техникасының ерекше екенін байқаған шығарсыз. Музыкалық шығармалардың кейбір эпизодтарында дыбыс ерекше жылдамдықпен шарықтайтын тұстары болады.
Ондай кезде дыбыс маржандай төгіліп немесе бір арнада құйылып жатқандай сезім туғызады. Міне, музыкадағы осындай құбылысты пассаж деп атайды. «Пассаж» деген терминді француз тілінен аударғанда «өткел» деген мағына береді. Шындығында, музыкант пассаж орындағанда жылдам темппен бір регистрден екіншісіне өтеді, сондай-ақ пассаж шығармадағы бірнеше тақырыпты байланыстырады.
XIX ғасыр музыкалары мен қазіргі таңдағы музыкалық шығармаларда мұндай «көпірлер» өте азая түскен. Пассаж – зор жылдамдықтағы дыбыстардың кезектестігі. Пассаждар көбінесе опералық әндерде болады. Паганинидің скрипкаға арналған шығармалары мен Шопеннің фортепьяноға арналған шығармаларында пассаж жиі кездеседі. Сондай-ақ қазақ күйлерінде де мұндай музыкалық құбылысты кездестіруге болады.