Өзіміздің дербес спутниктік навигациялық жүйеміз болады

«Қазақстан ғарыш сапары» биыл жоғары дәлдікті ғарыштық навигациялық жүйесінің құрылымын құру жобасын іске қосқанын мәлімдеген еді. Бұл жүйе нақты қай кезеңде тұтынушыға қызмет көрсете алады?
Марат, Алматы қаласы
Бұл ретте «Қазақстан ғарыш сапа­ры» компаниясының президенті Ғабдул­латиф Мырзақұлов былай дейді:
– 2012 жылдың аяғында Қазақ­стан­ның бүкіл аймағында жоғары дәлдікті нави­гациялық алаң құрылады. Ол арна­йы құрал-жабдығы бар тұтынушыларға қай жерде тұрғанын аса жоғары дәл­дік­пен көрсетіп бере алады. Осы мақсатта 40 аймақтық  дифференциалдық стансы салу жоспарда бар. Тұтынушылар қазіргі қолданыстағы америкалық GPS, ресейлік ГЛОНАСС спутниктік жүйелер сигнал­дары­мен қоса, біздің де сигналдарды қабылдай алады. Әйтсе де тұтынушылар GPS арқылы бірнеше метрлік дәлдікке қол жеткізе алатын болса, біздің жүйеміз арқылы олар метрлік, тіпті сантиметрлік дәл­дікпен тұрған жерін анықтай ала­ды.
Биыл осындай 10 стансыны құруды жос­парлап отырмыз, қалған 30 стан­сы­ны салу 2012 жылға белгіленген. Бұл жо­ба­дағы біздің әріптестеріміз швей­ца­риялық және жапониялық компаниялар болып табылады.
Біздің қызметті тұтынушылар мем­лекет­тік құрылымдар, ұлттық компания­лар, жеке фирмалар мен қатардағы тұты­нушылар болады деп санаймыз. Атал­ған жүйені жер кадастрын, карто­гра­фияны белгілеу, жылжымалы көлікті қа­дағалау мен бақылау, геодинамиканы зертт­еу, құрылыс және жол мониторингі тә­різ­ді көптеген сала пайдалана ала­ды.