Отпантауда не қасиет бар?

Маңғыстау өлкесінің ең биік жері саналатын осы таудың қасиеті туралы қоғамда жиі айтылып жүр. Оны иеленген елдің мәртебесі де биік болады деген де түсінік бар. Соған қарамастан осы күнге дейін Отпантаудың құпиясы ашылды деуге әлі ерте, – дейді кейбір ғалымдар... Сонда оның сыры неде?
Мәді Құдайберген, Ұзынағаш
«...Өткен бір замандарда Сарытас шығанағының жағасында бай қалашық болыпты. Бұл кезде Маңғыстауды ноғай­лар мекендеген екен. Сонда Мамайдың інісі Орақ бір шайқаста қаза болады да, ноғайлардың  күші енді кеміген болар деген оймен көрші елдің ханы Мамайға өз жаушысы Қанбұқаны жібереді. Жаушы «Көкбұлақ пен Отпантауды босатсын» деген хан талабын жеткізеді. Мұндай қорлыққа төзбеген Мамай хан елшілерін құлақ-мұрнын кесіп қайтарады. Осыдан кейін соғыс басталады. Хан әскері Мамайдың өзін арбаның дөңгелегіне байлап әкетеді. Артынан Мамайдың  екі ұлы – Қарасай мен Қази әскер жиып  барып, ханды әскерімен қоса талқандап, халқын тұтқындап, әкесін босатып алып қайтады».
Бұл – өлкетанушы Есбол Өмірбаевтың Орақ пен Мамай батырларға қатысты  айтылған аңызынан Отпантау туралы бір дерек қана. Қашаған ақын былай деген:
 Отпантаудың басында
 Дегелек деген   бір құс  бар.
 Аспанда жүріп ысқырса,
 Мың орда жылан басылған, – деп жырлапты.
 Сонда бұл таудың ұшқан құсы мен жыбырлаған жыланына дейін Құдай тағала  тарапынан «арнайы кодқа» ие болған сияқты көрініп кетеді. Ал 362 әулиелі Маңғыстау осы Отпантаудан басталады десек, еш қателеспейміз.