Отан қорғаушылар күніне арналған спорттық додалар өте ме?
Біздің елде елеулі де мерекелі күндер қарсаңында спорттық жарыстар мен додалар өткізіліп жатушы еді. Сондай жарыстардың Отан қорғаушылар күніне арнап өткізілгендері бар ма?
Әнуар Нұрланұлы, Қарағанды облысы
Әрине, бар. Мысалы, өткен демалыс күндері Алматыда Жеңіс күні мен Отан қорғаушылар күніне арналып дәстүрлі веложарыс өткізілді. Оған Алматы қаласының әкімі Ахметжан Есімовтің өзі қатысты. Сондай-ақ жақында ғана УЕФА кубогының иегері атанған «Қайрат» футзал клубы да аталмыш шараға келіп, мерекелі веложарыстың ажарын ашты.
Алысқа бармай-ақ, сіздің облысыңыз жайлы айтар болсақ, кеншілер қаласында ішкі істер қызметкерлері арасында шағын футболдан теңбіл доп додасы ұйымдастырылды. Полицейлер арасындағы бұл турнирге 30-дан астам команда қатысты.
Астанада Отан қорғаушылар күніне арналып Қазақстан Қарулы Күштері арасында жеңіл атлетикадан (жүгіруден) жарыс өткізілді. Сондай-ақ елордада Төтенше жағдайлар министрлігі бөлімшелері арасында спорттың бірнеше түрінен жарыстар (сайыстар) өткізілді.
Санай берсек, мұндай додалар өте көп. Әр облыс орталығында, ірілі-ұсақты қалаларда Отан қорғаушылар күніне арналып әртүрлі спорттық шаралар ұйымдастырылуда.
