«Оскар» кімге берілді?
Биылғы «Оскар» сыйлығы қандай киноларға берілді? Үздік кинолардың ішінде қазақ киносы бар ма?
Рүстем Қайсарұлы, Алматы облысы
Атақты «Оскар» сыйлығын тапсыру рәсімі биыл Голливудта 84-рет өтті.
Миллиондаған көрермендерді жаулап алған кинотуындылар қатарында әзірге қазақ киносы қара көрсете қойған жоқ. Әлемдік Би-Би-Си ақпарат агенттігінің мәліметінше, «Ең үздік шетел фильмі» аталымы бойынша ирандықтар түсірген «Ажырасу» фильмі бірауыздан «Оскарға» лайық деп танылған. Иран кинематографистерінің туындысы бұл беделді сыйлыққа бірінші рет қол жеткізіп отыр. «Екінші пландағы ең үздік әйел рөлі» аталымы бойынша «Оскарға» «Қызметші» фильмінде ойнаған американдық актриса Октавия Спенсер ие болды. Ал француздардың түссіз әрі дыбыссыз «Әртіс» киносы «Ең үздік фильм» аталымында жеңіске жетіп, негізгі «Оскарды» алды. Бұл картина бұған дейін де бірнеше беделді сыйлықтарды иеленген.
2011 жылдың «Ең үздік фильмі» аталымына «Уақыт сақтаушысы», «Әртіс», «Ұрпақтар», «Өте қатты және мүлдем жақын дауыс», «Қызметші», «Париждегі түн», «Бәрін өзгерткен адам», «Өмір ағашы», «Әскери ат» фильмдері өзара тартысқа түскен. «Оскарды» тапсыру салтанатына қатысты шаралар Лос-Анжелесте әлі бірнеше күн жалғасады.
