Мұнар атаны неге Қанабек Байсейітов сомдады?

Естуімше, «Алты жасар Алпамыс» фильміндегі Мұнар ата рөліне әуелде Кененбай Қожабеков бекітілген екен. Ал не себепті Қанабек Байсейітов түскен?
Манар НҰРБЕРГЕН, Қапшағай
Мүгедектік арбаға ерте таңылған Кененбай Қожабековтің таланты мезгілсіз сөніп қалмауы үшін Абдолла Қарсақбаев оны әрбір фильмінен сырт қалдырмауға тырысқан екен. Содан ол «Алты жасар Алпамыстағы» Мұнар ата рөліне де әуелде актер досын бекітеді. Бұл жөнінде Кененбай Қожа­беков өзінің бір естелігінде: «Абдолла тағы да мені «Алпамысқа» түсуге ша­қыр­ды. Сцена­рийді оқып, көңіліме тоқып, грим­делуге бардым. Көпті көр­ген, ауылдың дана қарты, бұрынғы балуан шал бейнесі көз алдыма келді. Фильмге түсер алдында гримделіп болып, айна­ға қарадым. Әлгі Абдолла көкейін­дегі, сценарийдегі дана қария тұлғасына сырт пішінім ғана емес, ішкі жан дүнием, ой-сезімім үйлеспейтін сияқ­ты. Шығара алмай, күлкіге қалам ба деп қорқып, күдік­тене бердім. Бұл образ Қанекеме келіп тұр ғой деген ойда қал­дым. Жап­сыр­ған сақал-мұртымды жұлып тастап, коляскімен жүріп кеттім. Машина­ма мі­не­йін деп жатқанда қал­баңдап Абдолла келді. Мен бас тарттым. «Бұл – нағыз Қанекеңнің рөлі», – деп шы­ным­ды айт­тым», – дейді. Сөйтіп, Мұнар ата рөлін Қанабек Байсейітов ойнап шығады. Кененбай Қожабеков айтса, айтқандай, Мұнар ата бейнесі Қанабек Байсейітовтің сомдауында өте сәтті шық­ты. Бұл – сон­дай-ақ өнер шеберінің кино­да жасап кет­кен соңғы бейнесі.