Мүгедектікке қалай шығамын, оған қандай құжаттар қажет?
Менің қан қысымым өте жоғары. Артериялық гипертониямен ауырамын. Осы ауру бойынша мүгедекті қалай рәсімдеуіме болады?
Бекзат, Арыс қаласы
Бұл сұраққа Оңтүстік Қазақстан облыстық дәрігерлік-әлеуметтік сараптама саласының басшысы Фарида Оспанова жауап береді:
–Тұрғылықты орны бойынша медициналық мекемелердің дәрігерлік-кеңестік комиссиясы уақытша еңбекке жарамсыздығына сараптама жүргізеді және оның көрсеткіштері керек болған жағдайда медициналық-әлеуметтік сараптамаға (ары қарай МӘС-ке) жолданады. Ол үшін мынадай құжаттар қажет: 1. Медициналық-әлеуметтік сараптамаға жолдама (088 у нысаны) рәсімделген күннен бастап 1 айдан кешіктірілмей; 2. Жеке басын куәландыратын құжаты; 3. Тұрғылықты тұратын жері туралы анықтама; 4. Амбулаторлық картасы; 5. Кәсіби еңбекке қабілетін жоғалту белгіленген жағдайда – еңбек қызметіне байланысты жазатайым оқиға немесе қызметкерлер денсаулығының өзге де зақымдануы туралы Н–1 нысаны бойынша актіні, Ұлттық еңбек гигиенасы мен кәсіптік аурулар орталығының немесе кәсіптік аурулар клиникасының мерзімі екі жылдан аспаған қорытындысын; жалпы еңбек қабілетін жоғалтуын белгілеген жағдайда – міндетті әлеуметтік сақтандыру жүйесіне қатысу фактілерін растайтын анықтама;18 жасқа дейінгі адамдарға тәрбие, білім беру түрлері мен нысанын айқындау үшін айғақтар белгіленген жағдайда – психологиялық-медициналық-педагогтік концультацияның қорытындысын ұсынады.
