Мүгедек баланы күткені үшін қанша ақы төленеді?

Менің бір туысымның баласы туғаннан І топтағы мүгедек, екі аяғын баса алмайды. Сондықтан баланы күтіп, анасы жұмыс істей алмай отыр. Әлеуметтік қамсыздандыру бөлімінен анасы тұрақты күтуші болып тағайындала ала ма? Тағайындалатын болса, мүгедек баланы күткені үшін қанша ақы төленеді?
Дария КҮМІСХАНОВА, Қызылорда облысы
Заңға сәйкес, медициналық ұйымдар ауруға, жарақат зардаптарына немесе кемістікке байланысты ағза функция­лары­ның тұрақты бұзылуын растайтын диагнос­тикалық, емдеу және оңалту іс-шараларын жүргізгеннен кейін адамдарды диагнозы белгіленген сәттен бастап кемінде төрт айдан кейін медициналық-әлеуметтік са­раптамаға жібереді. Мүгедектік тағайын­далған жағдайда жәрдемақы көлемі қа­растырылады. Сонымен қатар қазіргі таң­да мүгедек бала тәрбиелеп отырған отба­сы­ларды әлеуметтік қолдауды дамыту мақ­сатында «Қазақстан Республикасының кей­бір заңнамалық актілеріне азаматтардың жекелеген санаттарын әлеуметтік қолдау мәселелері бойынша өзгерістер мен толықтырулар енгізу туралы» Қазақстан Республикасы Заңының жобасында 2010 жылдан бастап оларды өсірген анасына немесе әкесіне, асырап алушыға, қорған­шыға (қамқоршыға) ең төменгі айлық жалақы мөлшерінде мүгедек балаға бері­летін жәрдемақының жаңа түрі көзделді және осы жәрдемақыны алу құқығын растайтын құжаттардың тізбесі белгіленді. Төменгі айлық жалақысы 2010 жылы 14952 теңге болып белгіленді. Облыс, қала және аудан әкімдері жергілікті бюд­жет қаражаты есебінен өз құзыреті шегінде азаматтардың жекелеген санаттарына, оның ішінде бірінші, екінші топтағы мүге­дектерге материалдық және әлеуметтік көмек көрсетуге құқылы.