«МАОКАМ, МАОКАМ-ға жазылу жүріп жатыр» деген сөздер жиі айтылатын болды. Бұл қандай мағына береді?
Құрмет ӘБДІЛДИН, Алматы
МАОКАМ – қазақ тілінде құралған сирек аббревиатуралардың бірі. Мемлекеттік Арнайы Ортамерзімді Қазынашылық Міндеттеме деген сөздердің алғашқы әріптерінен жасалған. Бұл құнды қағаздардың шығарылуының мәні – Үкімет халықтан қарызға ақша алып, оған жылына 6,5 пайыздық өсім төлейді. МАОКАМ-ға жазылу осы құнды қағазды сатып алу деген мағынаны береді. Қазпошта бөлімшелері 21 қазан мен 3 қараша аралығында азаматтардан өтініш қабылдайды. Ол үшін жеке бас куәлігі мен СТН қажет. Үкімет осы құнды қағаздар арқылы алған борышын 2011 жылы өтейді, ал сыйақыны жылына екі мәрте төлейді. Сенімділік тұрғысынан алсақ, доллар түрінде шығарылғандықтан валюталық тәуекел кемиді, әрі борыш алушы мемлекет болғандықтан, дефолт ықтималдығы өте аз саналады.