Күзетшіге жалақы қалай төленеді?

Мәдениет үйінің штаттық кестесінде екі күзетші кешкі сағат 18.00-ден таңғы 08.00- ге дейін ауы­сым­мен жұмыс істейді. Күзетшілерге айлық күнделікті 8 сағатқа төленуі керек пе, әлде 12 сағатқа ма?  
Жантас Есенғалиев, Ақтөбе облысы 
ҚР Еңбек кодексінің 84-бабына сәйкес, өндi­рiстiк процестiң ұзақтығы не жұмыс берушiнiң өн­дiрiстiк қызметiнiң режимi күнделiктi жұмыс ұзақ­тығының нормасынан асып кеткен жағдайларда ауы­сымдық жұмыс белгiленуi мүмкiн.
Бұл ретте, Кодекстің 89-бабына сәйкес, үстеме жұмыстар әрбiр қызметкер үшiн тәулiк iшiнде – екi сағаттан, ал ауыр жұмыстарда, еңбек жағдайлары зиянды (ерекше зиянды) және (немесе) қауiптi жұмыстарда бiр сағаттан аспауға тиiс.
Үстеме жұмыстардың жалпы ұзақтығы айына 12 сағаттан және жылына 120 сағаттан аспауға тиiс.
Ауысымдық жұмыс кезiнде қызметкерге барлық нақты жұмыс атқарған сағаттарына төлем жүр­гізіледі.
Сонымен қатар азаматтық  қызметшілерге ең­бека­қы төлеу жүйесі «Азаматтық қызметшілерге, мем­лекеттік бюджет қаражаты есебінен ұсталатын ұйым­дардың қызметкерлеріне, қазыналық кәсіп­орындардың қызметкерлеріне еңбекақы төлеу жүйесі туралы» Қазақстан Республикасы Үкіметінің 2007 жылғы 29 желтоқсандағы  № 1400  қаулы­сы­на, 19-қосымшаға сәйкес, мемлекеттік меке­ме­лер мен қазыналық кәсіпорындардың қызметкер­лері­не түнгі уақытта жұмыс істегені үшін кешкі сағат 22.00-ден таңғы сағат 6.00-ге дейін әр сағат үшін сағат­тық ставканың 50% мөлшерінде қосымша ақы тө­ле­неді.