Комедияны кім бастады?

Комедиялық фильмдер алғаш қай елде түсірілген? Ал қазақтың тұңғыш комедиясын кім түсірген?
Әсел ҚАЙРАТҚЫЗЫ, Астана қаласы

Жалпы, әлемдік кино өнерінің тырнақалды фильмдері комедиялық жанрдан бастау алды десек болады. Көркемсуретті кино өнерінің алғашқы қада­мы ағайынды Люмьерлердің комедиялық элементтері бар «Политый поливальщик», Жорж Мельестің шытырман оқиғаға толы фантастикалық фильмдерімен басталғаны белгілі. Комедия жан­рын­да түсірілген фильмдер халықтың сүйсіне көре­тін шығармаларына айналды. Чарли Чаплин, Бас­тер Китон, Григорий Александров, Иван Пырьев, Гри­горий Данелия т.б. режиссерлердің фильмдері кино өнерінің алтын қорына енді. Яғни комедия жанры арқылы уақыт белгісін, қоғам тынысын, ха­лық­тың мұң-мұқтажын, арман-мүддесін, жақсылық пен жамандықтың, ақ пен қараның, әділдік пен әді­ле­т­сіздіктің ара-жігін әзіл-әжуамен жеткізу кө­рер­менді экранға жақындатудың бірден-бір жолы бол­ды. Ал қазақ киносының тарихында комедия жан­ры­ның ең бір шарықтаған тұсы өткен ғасырдың алпысыншы жылдары екендігі баршаға аян. Осы кезеңде дүниеге келген «Тақиялы періште», «Біздің сүйікті дәрігер», «Алдар көсе» сияқты Шәкен Айма­новтың фильм­дерінен кейін комедия жанрында түсірілген айтулы шығармалар қазіргі таңда жоқтың қасы.