Колледж мұғалімінің жалақысы қалай есептеледі?

Мен колледжде оқытушы болып жұмыс істеймін. Еңбек өтілім – 11 жыл. Менің білгім келгені, колледж мұғалімінің жалақысы қалай есептеледі? 11 жылдық еңбек өтілімен қанша жалақы алуым керек?
Жанар ТҰРАНОВА, Қызылорда облысы
Еңбекті нормалау және еңбекке ақы төлеу басқармасының сарапшы мама­ны­ның мәліметінше, ұйымдар қызмет­керлерінің лауазымдық жалақылары (ставкалары) (ЛЖ) атқаратын лауазым­дарының лауазымдар санаттарына жат­қызылуына және мамандығы бо­йынша жұмыс өтіліне, тағайындалған біліктілік разрядтарына (жұмысшылар үшін) қа­рай лауазымдық жалақыларын (ставка­ларын) есептеу үшін бекітілген тиісті коэффициенттерді ҚР Үкіметі белгілеген базалық лауазымдық жала­қының (БЛЖ) мөлшеріне көбейту жолы­мен айқында­лады. Азаматтық  қызметші­лердің  санат­тар бойынша лауазымда­ры­ның тізіліміне сәйкес, техникалық және кәсіптік, орта білімнен кейінгі білім беру оқу орнының оқыту­шыларына еңбекақы төлеу G-7 санаты бойынша жүргізіледі. БЛЖ бүгінгі күні 17 697 теңгені құрайды. Мәселен, мамандығы бойынша 9-дан 11 жылға дейінгі жұмыс өтілі бар техникалық және кәсіптік, орта білімнен кейінгі білім беру оқу орыны оқытушысының ЛЖ  – 56 984 теңгені құрайды (17 697* 3,22).
Сонымен бірге білім және ғылым министрінің 2008 жылғы 29 қаңтардағы №40 бұйрығымен бекітілген «Бюджет қаражаты есебінен қаржыландырылатын мемлекеттік білім беру ұйымдарының қызметкерлеріне жалақы есептеу  ереже­сіне» (бұдан әрі – Ереже) сәйкес, мемле­кеттік білім беру ұйымдарының педагоги­калық қызметкерлеріне еңбекақы төлеу айлық белгіленген тарифтік ставкаларға (лауазымдық жалақыларға) қарай еңбе­ка­қыны көтеру, қосымша ақы төлеу және педагогикалық жұмыстың нақты көлемі ескеріле отырып жүргізіледі.
Педагогикалық қызметкерлердің ай­лық жалақысы тарифтік ставканы (лауа­зым­дық жалақыны) олардың апталық нақты жүкте­месіне көбейту және шыққан нәтижені бел­гіленген нормативтік апталық оқу жүк­теме­сіне бөлу жолымен белгілене­ді.