Ким деген кім?

Қазақтың заңғар жазушысы Мұхтар Әуезовтің «Абай жолын» Анатолий Ким деген жазушы орыс тіліне аударыпты. Осы атақты шығарманы орыстілді оқырманға жеткізген аудармашы автор туралы білгім келеді.
Сәбит ОРЫНБЕКҰЛЫ, Алматы облысы

Белгілі жазушы-аудармашы Ана­толий Андреевич Ким 1939 жылдың 15 маусымында Оңтүстік Қазақстан облысындағы Сергеевка ауылында дүниеге келген. Оның ата-анасы 1937 жылдардың зұлмат кезеңінде Ресей­ден Қазақстанға жер аударылып келген. Олардың отбасын қызыл өкі­мет 1947 жылы қайтадан Ресей жері­не – Сахалинге жібереді.
Анатолий Ким Мәскеудегі көр­кем­сурет училищесінде білім алған. 1971 жылы Мәскеудегі М. Горький атындағы Әдебиет институтын сырт­тай оқып бітірген. Бірнеше кітаптар­дың авторы, көптеген басылымдар мен баспаларда жауапты қызметтер атқарған қаламгер әдебиеттегі сіңір­ген еңбегі үшін бірқатар беделді сый­лықтардың иегері саналады.
Қалың оқырманға Анатолий Ким­нің есімі қазақ қаламгерлерін орыс тіліне аударып жүрген жазушы ретінде де жақсы таныс. Ол қазақтың қабыр­ға­лы қаламгерлері Әбдіжәміл Нұр­пейі­совтің «Соңғы парыз» рома­ны мен Әбіш Кекілбаевтың «Аңыздың ақыры» романын орыстілді оқырман­дарға жет­кізді. Ал 2007 жылы ұлт суреткері Мұх­тар Әуезовтің «Абай жолы» эпо­пея­сын жаңа нұсқада орыс тіліне ау­дар­ды. Бұ­ған дейін аталған үлкен шы­ғарма кезін­дегі кеңес өкіме­тінің қатаң цензура­сы­ның қадаға­лауы­мен ауда­рылған еді. Ал Ана­толий Кимнің нұс­қа­сындағы «Абай жолының» жаңа аудармасы ба­рынша түпнұсқаға жа­қын­датылып, оқы­р­­ман­ның эпопеяға жаңа бір қыры­нан қарауына ықпал етті.