Кактус компьютерден қорғай ма?

Компьютердiң алдында ұзақ уақыт жұмыс iстейтiн адамдар жанына кактус гүлiн қойып қоятынын жиi көремiз. Кактустан басқа қандай гүлдер адамға пайдасын тигiзедi?
Ерлан Нұрылдаев, Қызылорда
Теледидар, компьютер, толқынды пештердiң сәулелерiнен сақтануға раушан гүлдер, орхидея, өрмелегiш өсiмдiктер көмектеседi. Ал шегiргүлдердi (фиалка) балалар бөлмесiне орналастырсаңыз, жеткiншектiң өсiп-жетiлу уақытындағы көңiл күйiн бiрқалыптылыққа бейiмдейдi. Қазтамақ (герань) гүлiнiң қасында бiраз уақыт отырсаңыз да жеткiлiктi, сiз өзiңiздiң жаңа күш жинап, демалғаныңызды сезесiз. Өйткенi бұл өсiмдiк эфир майларын бөлiп шығарады. Адам ағзасындағы зат алмасудың бiр қалыпқа келуiне пайдасы зор. Ұсақ жапырақты бұрыштар мен хризантемалар отбасындағы, жұмыс орнындағы адамдардың бiр-бiрiне деген жылы қарым-қатынасын қалыптасуына әсер етедi. Бөлмеңiзге гүл жапырақтарының жалпақ, домалақ тәрiздес түрлерiн көп өсiргенiңiз жөн. Олар сiздiң үйiңiзге табыс, ақша келуiне әсер етедi. Жапырақтардың тiкенек, тiк (мысалы, кактус, алоэ) болғаны адамға қолайсыздық туғызуы мүмкiн. Әсiресе, отбасыларда ұрыс-керiс шақырады. Дәрiлiк өсiмдiк ретiнде қажеттiлiк тудырса, кез келген дәрiханадан алоэны сатып алуға болады. Гүлдерiңiздiң ауруға шалдыққанын, сарғайып кеткенiн байқасаңыз, олардың орнын басқа жерге ауыстырыңыз. Болмаған жағдайда одан құтылғаныңыз жөн.