Гибралтар – УЕФА-ның жаңа мүшесі
Мен Гибралтарды жай ғана бұғаз екен деп жүрсем, мұндай ел де бар екен ғой. Тіпті бұлар УЕФА-ға мүше болғысы да келеді екен. Бұл сыбыс қаншалықты рас? «Кәртамыс құрлық» қауымдастығы көбейді ме?
Нұртөре СЕЙІТЖАНҰЛЫ, Алматы облысы
Иә, Гибралтар – бұғаз ғана емес, тұтас бір мемлекет. Ұлыбритания патшалығының иелігінде. Аумағы 6,8 шаршы шақырымды ғана құраса, халқы 30 мың адам ғана. Дегенмен соған қарамастан, өздерінің футбол федерациясы бар. Сонау 1905 жылы құрылған. Аяқдоптан ұлттық біріншілігі де өтіп тұрады. Соңғы ел чемпионы – «Линкольн» командасы. Ол ештеңе емес, жақында Ресейдің Санкт-Петербург қаласында өткен УЕФА-ның кезекті жиынында Гибралтар футбол федерациясы аталмыш қауымдастыққа мүше 54-мемлекет болып тіркелді. Рас, әлі толық мүшесі емес. Бірақ бұл уақыттың еншісіндегі мәселе. 2013 жылдың мамырында Англия астанасы Лондонда өтетін УЕФА-ның кезекті мәслихатында Гибралтар толық мүшелікке алынып, келесі маусымнан бастап клубтары еурокубок додаларына қатыса бастайды. Ал ұлттық құрамасы 2016 жылғы Еуропа чемпионатының іріктеу турнирінде өнер көрсететін болады. Айта кетейік, негізі, УЕФА мүшелігіне өту туралы өтінішті Гибралтар 2007 жылы жіберген болатын. Бірақ ол акезде Еуропа футбол қауымдастығы бұл елді мемлекет ретінде мойындамаған.
