Ғарышкерлер қанша табады?

Қазақстан келешекте ғарыш державасына айналу мақсатын алға қойып отыр. Жалпы, ғарышкерлердің жалақысы қанша?
Мерей Әзімбек, Алматы
 ҚР Қарулы Күштерінің генерал-майоры, «Қазақстанның ұшқыш-ғарышкері» құрметті атағының ие­гері Тоқтар Әубәкіровтің сө­зі­не қарағанда, армия прапорщигінің дә­режесінде зейнетақы алады. 2006 жылы Ресей космонавтта­ры­ның айлығы 767 доллар болса, 2010 жылдан бастап жарты жыл еңбегіне 150 мың доллар ақы ала­тын болды. Айтпақшы, тұңғыш ға­рышкер Ю.Гагарин 1962 жылы 575,1 доллар жалақы алған екен. Салыстыратын болсақ, 1969 жылы Айға қонған америкалық астро­навт Нил Армстронгтың айлығы 1666 доллар болған. Негізі, ға­рыш­қа ұшқан космонавт пен ұш­па­ғандардың жалақысында айыр­ма­шылық бар. Қырық шақты адам қыз­мет ететін ресейлік космонавт­тар­ды даярлау орталығында орта­ша айлық мөлшері – 533-611 дол­лар ғана. Кейбір атақты кос­монавттар, тіпті Ресей батыры ата­ғын алғандар бала-шағасымен бір бөлмелі пәтерде тұрып жатыр екен. Дегенмен ғарышқа көтерілген әрбір космонавт үшін қоғамдық көлікте жүру тегін және комму­нал­дық төлем төлемейді. Ал АҚШ-тың NASA қызметкерлерінің айлы­ғы 10 854 долларға тең. Дегенмен кейбір деректер бойынша АҚШ-тың космонавтика саласында істейтін қызметкерлерінің (ғарыш­та немесе Жерде істегеніне қа­ра­мастан) жалақысы 30 мың дол­лардың ар жақ, бер жағында кө­рінеді.