Әлемде қай елдің ғаламторы, мобильді байланыс жүйесі жақсы дамыған? Дүниежүзі халқының қанша пайызы ғаламтор мен ұялы телефонды пайдаланады?
Мейірхат Елемес, Алматы
Жақында халықаралық электробайланыс одағы ақпараттық технологияларға қолжетімділік деңгейі бойынша әлемдегі елдердің рейтингін жасады. Аталған одақ сарапшыларының айтуынша, ғаламдық дағдарысқа қарамастан ұялы телефондарға деген сұраныс жоғары, ал ғаламтор аясы барған сайын кеңейіп келеді. Сонымен рейтингтің ең үздік ондығын Швеция, Люксембург, Оңтүстік Корея, Дания, Нидерланды, Исландия, Швейцария, Жапония, Норвегия және Ұлыбритания бастап тұр. Алпауыт АҚШ – 19 орында, Эстония – 22 орында, Ресей – 48 орында, Белоруссия – 55 орында келеді.
Жалпы, әлем халқының 26 пайызы, яғни 1,7 млрд адам ғаламторды пайдаланса, ал кедей елдерде ғаламтордың игілігін әрбір бесінші тұрғын ғана көре алады. Дамушы елдер халқының 57 пайызы үшін ұялы телефон таңсық емес. Негізінен, Қытай, Сингапур, Кувейт, АҚШ, Данияда соңғы ақпараттық технологияларды пайдалану ақысы өзге елдерге қарағанда, әлдеқайда арзан тұрады.