Ғабитхан деген кім?

Абай мен Көкбайды және Абайдың ұлдарын оқытқан Ғабитхан деген молда жайлы естігенмен, ол туралы мәлімет таба алмадым. Ғабитхан қандай адам болған?
Сағыныш, Қызылорда қаласы
Ғабитхан (1835-1932) – Құнанбай ба­ла­ларын және басқа да тобықты бала­ларын оқытқан ноғай молда. Абай сегіз жасынан бастап Ғабитханнан оқы­ған. Ғабитхан ке­зінде солдаттан қашып, қазақ ауылына сіңіп кеткен. 1857 жылдан Құнанбайдың «Есен­бай жырасы» деген жерде салдырған мед­реседе, 1880 жылдан бастап Абайдың Жи­дебайда тұрғызған медресе үйінде дәріс береді. Ғабитханның қолымен араб әріп­те­рімен жазылған хаттары – абайтану сала­сына қосылған қымбат қазына. Олар Құ­нанбай мырзаның атынан Омбыда кадет кор­пусында оқып жүрген Халиоллаға 1866 жылы ақпан айының 4-інде жазған хаты, 1866 жылы наурыз айының 8-інде Ибрагим атынан жолдаған хаты. Ғабитхан 1932 жылы ашаршылық кезінде қайтыс болып, Жидебайда жерленген. 2006 жылы Ғабит­хан зиратына құлыптас орнатылды. Ғабит­хан зираты Жидебай қорығындағы Құдай­берді-Зере-Ұлжан зират қорғанында.