Еңбекке жарамсыздық парағы қанша уақытқа беріледі?

Еңбекке жарамсыздық парағы қандай ереже бойынша және ең көп дегенде қанша уақытқа берілуі мүмкін?
Қазанғап СӘЛІМТЕГІ, Қызылжар
ҚР Еңбек  кодексінің 159-бабына сәйкес, жұмыс берушi өз қаражаты есебiнен қыз­меткерлерге еңбекке уақытша жарамсыздық бойынша әлеуметтiк жәрдемақы төлеуге мiндеттi. Қазақстан Республикасы­ның Үкiметi бекiткен тәртiппен берiлген ең­бекке жарамсыздық парақтары еңбекке уақытша жарамсыздық бойынша әлеуметтiк жәрдемақылар төлеу үшiн негiз болып табылады. Еңбекке уақытша жарамсыздық бойынша әлеуметтiк жәрдемақылар қыз­меткерлерге еңбекке жарамсыздықтың бiрiн­шi күнiнен бастап еңбекке қабiлетi қал­пына келген күнге дейiн немесе мүгедектiк бел­гiленгенге дейiн Қазақстан Республи­касының заңнамасына сәйкес есептелген олардың орташа жалақысының есебiмен төленедi. Еңбекке уақытша жарамсыздық­қа сараптама жүргізу, жұмысқа уақытша жарамсыздық парағы мен анықтамасын беру қағидалары бойынша, жүктiлiк және босану, сондай-ақ «Екi айдан астам еңбекке уақытша жарамсыздық мер­зiмi белгiленуi мүмкiн ауру түрлерiнiң тiзбесiн бекiту туралы» Қазақстан Респуб­ликасы Үкiметiнiң 2007 жылғы 4 желтоқ­сан­дағы №1171 қаулысымен айқындал­ған жағ­дай­ларды қоспағанда, жұмысқа уақытша жарамсыздық анықтамасы әртүрлі сырқатпен ауырған қызметкерге екi айға дейінгі мерзiмге берiледi. Егер сараптама қорытындысы бойынша адам денсаулы­ғы нашар деп табылса, ДКК-ның екi ай­дан алты айға дейiнгi мерзiмге не­ғұр­лым жеңiл жұмысқа уақытша ауыстыру туралы қорытындысы берiледi. Мерзiмдi кәсi­бiне, аурудың ағымы мен асқыну­ына қарай дәрігерлік кеңес ко­мис­сиясы бел­гiлей­дi.