Еңбекақы қалай есептеледі?

Мектептің шаруашылық істері меңгерушісіне еңбекақы қалай төленуі керек? Қандай G санаты бойынша?
Түймеш Құдыретова, Оңтүстік Қазақстан облысы
Еңбекті нормалау және еңбекке ақы төлеу басқармасы маманының мәліметінше, Азаматтық қызметшілерге еңбекақы төлеу жүйесі Қазақстан Республикасы Үкіметінің 2007 жылғы 29 желтоқсандағы «Азаматтық қызметшілерге, мемлекеттік бюджет қаражаты есебінен ұсталатын ұйым­дардың қызметкерлеріне, қазыналық кәсіп­орындардың қызметкерлеріне еңбекақы төлеу жүйесі туралы» № 1400 Қаулысымен ( бұдан әрі – қаулы ) реттеледі.
Қаулының 3-тармағына сәйкес, ұйымдар қызмет­керлерінің лауазымдық жалақылары (ставкалары) (ЛЖ) атқаратын лауазымдарының лауазымдар санаттарына жатқызылуына және мамандығы бойынша жұмыс өтіліне, тағайындалған біліктілік разрядтарына (жұмысшылар үшін) қарай лауазымдық жалақыларын (ставкаларын) есептеу үшін бекітілген тиісті коэффициенттерді Қазақстан Республикасының Үкіметі белгілеген базалық лауазымдық жалақының (БЛЖ) мөлшеріне көбейту жолымен айқындалады.
Қаулыға 1-қосымшамен Азаматтық қызметшілердің санаттар бойынша лауазымдарының тізіліміне сәйкес, мемлекеттік мекемеге және қазыналық кәсіпорынға әкімшілік-шаруашылық қызмет көрсетумен айналысатын құрылымдық бөлімшенің жетекшісіне (соның ішінде шаруашылық) еңбекақы төлеу G-13 санаты бойынша жүргізіледі.
Бүгінге БЛЖ мөлшері 13613 теңгені құрайды.