Еңбек демалысына қосылатын экологиялық 7 күн үшін ақы төлене ме?

Мұғалімдердің 56 күн еңбек демалысына экологиялық 7 күн қосылады. Осы 7 күнге ақы төлене ме, ол қалай есептелінеді?
Кәмила Оңғарова, Шығыс Қазақстан облысы
ҚР «Білім туралы» № 319 Заңына сәй­кес, жалпы орта, техникалық және кәсіптік, орта білімнен кейінгі жоғары және жоғары оқу орнынан кейінгі білім беру ұйым­дары­ның педагог қызметкерлері үшін – ұзақ­тығы күнтізбелік 56 күн; оқу-әдістемелік қызметкерлері қамтамасыз ету, мектепке дейінгі және қосымша білім беру ұйым­дарының педагог қызметкерлері үшін күн­тізбелік 42 күн ақы төленетін жыл сайынғы демалыс алудың әлеуметтік кепілдіктерін иеленеді.
Бұл ретте ҚР Еңбек кодексінің 103-бабына сай жыл сайынғы еңбек демалы­сы­ның жалпы ұзақтығын есептеу кезiнде жыл сайынғы қосымша еңбек демалыстары (соның ішінде экологиялық ) жыл сайынғы негiзгi еңбек демалысына қосы­лады.
Орташа жалақыны есептеудің бірыңғай тәртібі ҚР Үкіметінің 2007 жылғы 29 жел­тоқсандағы «Орташа жалақыны есептеудің бірыңғай ережесін бекіту туралы» № 1394 қаулысымен айқындалады.
Ережеге сәйкес бес күндік, сондай-ақ алты күндік жұмыс аптасында орташа ай­лық жалақыны есептеу белгіленген қосым­ша ақылар мен үстемеақылар, сый­­лық­ақылар және еңбекақы төлеу жүйесінде көзделген тұрақты сипаттағы басқа да ын­та­ландыру төлемдері ескеріле отырып, тиісті кезеңдегі орташа күндік (сағаттық) жалақының есебі­нен нақты жұмыс істел­ген уақыт үшін жүргі­зіледі.
Қызметкердің орташа жалақысы орта­ша күндік (сағаттық) жалақыны оқи­ға ке­зеңіне сәйкес келетін жұмыс күн­дерінің (жұмыс сағаттарының) санына көбейту жолымен есеп­телінеді.
Орташа күндік (сағаттық) жалақы бар­лық жағдайларда есепті кезеңде есеп­телген жалақы сомасын жұмыс уақыты теңгерімін негізге ала отырып, тиісінше бес күндік не­месе алты күндік жұмыс аптасы­ның жұ­мыс күндері (сағаттары) санына бөлу жолымен анықталады.