Ең арзан газет қанша тұрады?
Мен күнделікті газет оқуды дағдыға айналдырмақ ойым бар. Алайда қаржылық дағдарыс кезінде қымбат газеттерді сатып алуға қалтам көтермейді. Осы орайда республикалық басылымдардан қай газеттердің ең арзан бағамен сатылатынын білуге бола ма?
Талғат Шәпенов, Алматы қаласы
Сіздің сұрағыңызға жауап алу үшін біз Алматыдағы газет тарататын бірнеше мекемеге хабарластық. Анықтағанымыздай, ең арзан газеттердың бір тобы «КазПресс» республикалық торабында сатылады екен. Сіз бұл тораптың дүңгіршектерінен ең төменгі бағаға, яғни 15 теңгеге республикалық басылымдардың арасынан тек «Время», «Экcпресс К», «Алаш айнасы» және «Фокус» газеттерін сатып ала аласыз. Әрине, әрбір газеттің ұстанған бағытымен қоса нарықта белгіленген өз бағасы бар. Мәселен, «Республика», «Аргументы» газеттері отандық газеттердің ішінде ең қымбаттарының бірі саналады – 90 теңге. Сонымен қоса бізде тегін таратылатын газет өнімдері де бар. Олар – «Эконом», «Плюс» сияқты жарнама мен хабарландырулар жарияланатын газеттер. Өз газетіміз жайлы айта кетсек, «Алаш айнасын» қолдан қымбаттататындар бар. Ондай дүңгіршектерді көзіңіз шалса, бізге хабарласуыңызға болады.
