Елімізде қанша балалар лагері бар?
Жалпы жазғы каникул кезінде балалардың көпшілігі арнайы демалыс орындарына, лагерьлерге шығады. Осы ретте елімізде неше лагерь бар? 
Мөлдір БОЛАТҚЫЗЫ, Оңтүстік Қазақстан облысы
ҚР Білім және ғылым министрлігінің мәліметтеріне қарағанда, Қазақстанда балаларға арналған 245 демалыс орны бар екен. Сондай-ақ аймақтардың көптеген мектептерінде бастауыш сыныптарына арналған маусымдық лагерьлер ашылған. Жалпы, биылғы лагерьлерде 1 миллионға жуық бүлдіршін демалатын болыпты. Ал Оңтүстік Қазақстанда Түлкібас ауданындағы «Машат» шатқалы мен «Самал» лагерінде демалу маусымы ашылды. Онда Оңтүстік Қазақстанның балалар үйлерінің 650 тәрбиеленушісі жазғы демалысын өткізуде. Лагерь облыстағы ең әсем жерлердің бірінде орналасқан. Тоғыз жыл бойы облыстағы балалар үйлерінің тәрбиеленушілері өздерінің мұғалімдерімен осы жерде демалады. Демалысты ұйымдастыруды облыстық бюджет қаржыландырады. Осы жазда «Самалға» 11 млн теңге бөлінді. Барлығы биыл облыстың 20 мыңға тарта оқушысы 30 лагерьде демалып, денсаулықтарын шыңдайды. Барлық аудандарда лагерьлер жұмыс істейді. Олардың 16-сы жергілікті әкімдік балансында, қалғандары жекеменшік ұйымдардікі. 15 күндік жолдаманың құны 15-17 мың теңге аралығында. Сонымен қатар тұрмысы нашар отбасыларының балаларына жеңілдіктер қарастырылған. Олардың жазғы демалысы облыстық қамқорлық кеңесінің қорынан өтеледі.
