Электрондық сөздік елге қашан жетеді?
Жақын болашақта қазақ тілінің электрондық терминологиялық сөздігі шығады дегенді естіп едік. Осы электрондық сөздіктің басқа сөздіктерден айтарлықтай айырмашылығы бар ма?
Гауһар ӨТЕПБЕРГЕНОВА, Алматы қаласы
Қазақ тілінің электрондық терминологиялық сөздігін жасау туралы мәселені ғалымдар соңғы жылдары жиі көтеріп жүр. Әсіресе, тіл мамандары жиналған басқосуларда аталмыш сөздіктің пайдасы туралы жиі айтылады. Мамандардың пікірінше, кітап сөздігіне қарағанда электрондық сөздік пайдаланушыларға өте қолайлы. Мұндай сөздіктің ең бір артықшылығы – электрондық сөздікті демде жаңа сөздермен толықтырып, ескі сөздерді өшіріп отыруға болады. Сондай-ақ баспалардан басылып шыққан терминологиялық сөздіктер міндетті түрде лингвистикалық және терминологиялық сараптаулардан өткізіледі. Кітап түріндегі сөздіктердің жарыққа шығуы біршама уақытты алатын болғандықтан, тіпті кейде құрамына енген терминдер тез ескіріп қалады. Дегенмен қазақ тілінің барлық терминдерін қамтитын сөздіктің электрондық нұсқасын жасау өте көп ізденісті, мамандардың еңбегін қажет етері анық. Сондықтан талайдан бері айтылып жүрген электрондық сөздік белгілі бір қиындықтарға байланысты құрастырылмай жатқан болса керек.
