Ақпарат кеңістігіндегі Қазақстан интернет энциклопедиясы тұтынушыларына қандай қызмет көрсетеді? Ондағы ақпараттардың дереккөзі қаншалықты сенімді?
Нұрбол МЕКЕБАЕВ, Ақтөбе қаласы
Қазақстан интернет энциклопедиясының (www.kk.encyclopedia.kz) басты мақсаты – Қазақстан туралы ашық және пайдалы ақпараттарға бай электронды энциклопедия ресурсын құрастыру. Бұл энциклопедия интернетті тұтынушылардың көмегімен жасалады.
Мысалы, кез келген адам электронды энциклопедиядағы белгілі-бір материалды түзетіп, не жаңасын енгізіп, өз үлесін қоса алады. Энциклопедия сайтына тіркелу міндет емес. Алайда сайтты тұрақты түрде пайдалансаңыз, тіркелгеніңіз дұрыс. Түсінетін, білетін салаларыңызға тиісті жаңа мақалалар не аудармалар жазуыңыз, суреттер салуыңыз мүмкін. Бұл энциклопедиядан тек қана бос лицензия бойынша таратылған ақпараттарды көшіруге болады. Егер сiздiң ақпаратыңыз авторлық лицензия бойынша қорғалған болса, онда оны ешкім рұқсатсыз көшіре алмайды.
Энциклопедияға енгізілетін мәліметтер бейтарап көзқараспен жазылуға тиiстi. Заңсыз әрі жалған ақпаратты бұл энциклопедияға енгізуге болмайды.
Себебі оған енгізілген ақпараттарға энциклопедия администраторлары жауап беруге міндетті емес. Сондықтан да электронды энциклопедия нақты да сенімді ақпараттың көзі бола алмайды.