Егеуқұйрық тістесе, дереу дәрігерге жүгініңіз
Аулада ойнап жүрген 4 жасар баламның аяғын егеуқұйрық тістеп алыпты, бірақ жарақаты үлкен емес. Дәрігерге барсақ, кіндіктен дәрі егіп, ине тыққылап, баламды қинайды ғой деп қорқып отырмын. Дәрігерге бармай-ақ емделудің жолы бар ма?
Пернеш, Алматы қаласы
Нұрсыйла Мамыр Сатымбайқызы, Алматы қаласының Түріксіб ауданы бойынша Мемлекеттік санитарлық-эпидемиологиялық қадағалау басқармасы бас маманы, дәрігер-эпидемиолог:
– Аулада, саяжайда, табиғат аясына шыққан кезде ит, мысық, егеуқұйрық, белгісіз жыртқыштар, кеміргіштер тістеген жағдайда міндетті түрде жедел дәрігерге қаралу керек. Өйткені олар әртүрлі вирусты ауру қоздырғыштары болып есептеледі. Сонымен қатар белгісіз жыртқыштардан, кеміргіштерден адамға «құтырған» ауруы жұғуы мүмкін. «Құтырған» ауруының белгілері узақ уақыттан кейін, тіпті кейде бір жылдан кейін де, белгілі болады. Уақытында егу қабылдамаған жағдайда адам өліміне әкеліп соқтыруы мүмкін.
Сондықтан балаңызды жедел түрде №1 қалалық балалар ауруханасының жарақат пунктіне алып барып, еккізіңіз.
