Дикторлар даусын «қойғыза» ма?

Әдетте, әншілер туралы айтқанда, «дауысын қойғызыпты» деп жатады. Осы «дауысты қою» деген дикторларға да қатысты ма?  
Зәмзәгүл НҰРТІЛЕУ, Алматы
Танымал диктор Сауық Жақанованың ай­туын­ша, дикторлар да дауысын «қойғызады». Себебі тамағымен сөйлейтін адамдар болады. Дауыс тамаққа кетсе, адам тез шаршап, қырыл­дап қала­ды. Сол сияқты іштен, диафрагмадан күмбірлеп шығатын дауыс бар. Ол үшін дыбысты шашырат­пай айту керек. Енді біреулер сөйле­генде жағы ашылмай қалатындықтан, әріптерді өз орнымен айтпауы мүмкін. Мұның бәрі «дауыс техникасы» болып табылады, ал «дауысты қою» дегеніміз – осындай нәрселерді реттеу. 
Бұрынғы уақытта хабарлардың барлығы эфир­ге тек қана дикторлардың даусымен кете­тін, журналистер шықпайтын. Шақырылған қонақтар ғана өз даусымен сөйлейтін. Диктор­лардан қате жібермей, анық сөйлеу, дикцияның тазалығы талап етілетін. Одақ тарап, бұрынғы құрылым­дар­дың бәрі ыдырап жатқан уақытта бұл жағына онша мән берілмей кеткен еді. Бірақ қазір радио, те­ле­ар­на журналистерінің сөйлей алатын-алмай­тын­дығы қайтадан ескеріле бас­та­ды. Жалпы, ұлттық өнер академиясында «Сах­на тілі» деген пән жүре­ді. Әрине, сахна мен эфир тілінің сәл-пәл айыр­ма­шылықтары бар. Дегенмен сөйлеу техникасы онда үш жыл бойы оқытылады. Де­мек, бұл – оп-оңай меңгеріле салатын дүние емес деген сөз.