Декреттік төлемақы неге кешігіп түседі?

– Мен босануға дейінгі жәрдемақымды алу үшін тиісті органға құжаттарымның барлығын өткізіп қойдым. Алайда ондағылар маған «енді ақша үш айдан кейін түседі» дейді. Сонда ол не үшін «босануға дейін» деп аталады? Онсыз да декреттегі адам жұмыстан айлық алмайды. Нағыз осындай қысылтаяң кезде декреттік жәрдемақыны ертерек беруге болмас па екен?
Гүлжан АСЫЛХАНҚЫЗЫ, Алматы қаласы
Бұл сұраққа Еңбек және халықты әлеуметтік қорғау министрлігінің бас маманы Айжан Жүсіпова жауап береді:
– Зейнетақы төлеу жөніндегі мемлекеттік орталық­тың құрылымдық бөлiмшелерi әлеуметтiк төлемдер тағайындауға қажеттi құжаттарды қабылдап алған күннен бастап бес жұмыс күнi iшiнде оларды әлеуметтiк төлемдер тағайындау жөнiндегi уәкiлеттi органға, яғни жергілікті Бақылау және әлеуметтік қорғау департаментіне жібередi. Департамент құжаттар келiп түскен күннен бастап он жұмыс күнi iшiнде оларды қарайды және әлеуметтiк төлемдер тағайындау немесе тағайын­даудан бас тарту туралы шешiм қабылдайды. Департамент өткізілген құжаттардың дұрыстығына тексеру жүргiзуге құқығы бap. Осындай тексеру барысында де­партамент өтініш берушіден қосымша құжаттар ұсы­нуды талап ете алады. Егер тапсырған құжаттарыңыз күмән туғызбайтын болса, онда міндетті әлеуметтік сақтандыру туралы заңнамалар аясында департамент шешім қабылдаған соң ғана әлеуметтік төлем сіздің банктік карточкаңызға (шотыңызға) құжат өткізген күннен бір айдан аспайтын мерзімде аударылады.