Биыл Күн мен Ай қай уақытта тұтылады?
Осы жылы Күн мен Айдың тұтылу құбылыстары бола ма? Толық мәлімет берсеңіздер.
Талғат Иманғалиев, Астана қаласы
Астрофизиктердің мәліметінше, 2013 жылы бес түрлі тұтылу құбылысы болады. Ай – үш рет, Күн екі рет тұтылады. Бірақ мамандар бұл құбылыстардың ешқайсысының толық тұтылуға жатпайтынын айтады. Қарашаның 3-іне сәйкес келіп отырған Күн тұтылуы ғана Жердің Гринвич меридианы және экватор тұсында (Гвинея шығанағы) толыққанды құбылыс болып байқалады. Биыл Ай мен Күннің тұтылу құбылыстары күн мен түннің теңелуі (21 наурыз), күннің ұзарып барып тоқырауы (22 маусым) немесе күннің қысқарып барып тоқырауы (22 желтоқсан) сияқты құбылыстармен де сәйкес келмейді. 2010 жылы Айдың тұтылуы күннің қысқы қысқаруымен қатар келген еді. Жылан жылы мұндай астрономиялық оқиғалар көктем және күз мезгілдерінде ғана болады.
2013 жылы болатын тұтылу құбылыстары (Астана уақыты бойынша):
25 сәуір, сағат 22.06 – Сарышаян белгісінде Айдың жартылай тұтылуы;
10 мамыр, сағат 02.24 – Торпақ белгісінде Күннің сақина тәрізденіп тұтылуы;
25 мамыр, сағат 06.09 – Қауыс (Мерген) белгісінде Айдың жартылай тұтылуы;
19 қазан, сағат 01.49 – Тоқты шоқжұлдызында Айдың жартылай тұтылуы;
3 қараша, сағат 14.46 – Сарышаян шоқжұлдызында Күннің гибридті тұтылуы.
