Бидің пайдасы қаншалық?

«Би қимылдары арқылы көңіл күйді де, денсаулықты да жақсартуға болады» дегенді естідім. Бидің адам ағзасына, шынымен де, пайдасы бар ма?
Нұрбүбі МЫРЗАҒАРА, Тараз
Мамандардың бұл орайдағы пікіріне жү­гін­сек, би­мен айналысу арқа, іш және аяқ бұл­шық еттерін нығай­тады әрі бүкіл ағзадағы және буындар мен омыртқадағы қан айна­лымын, сондай-ақ зат алмасу процесін жақ­сар­тады. Со­нымен қатар қимыл-қозғалыс­тың үйлесім­ділігін арттырып, дене бітімін жетіл­діруге, ты­ныс алу жүйесін жаттықтыруға кө­мек­теседі. Сон­дықтан да би­мен шұғыл­да­нуды арықтау­дың жолы ғана емес, түрлі жарақат­тар (алты айдан соң) мен сынық­тардан (10-12 айдан соң) кейін ағзаны қал­пына келтіру мақ­са­тын­дағы емдік шара ре­тінде қарас­тыруға болады. Бұл орайда, би қимылдары жүгіру, жаяу жүру сияқты басқа да жат­тығу түр­лері тәрізді, жү­рек-қан та­мыр­лары жүйе­сіне ар­тық салмақ сал­май-ақ, буын­дардағы қозғалыс көле­мінің артуына ық­пал етеді.
Сондай-ақ бимен шұғылдану адамның бо­йын же­ңілдетіп, жүйкесін тыныштан­ды­рады. Сол себепті де ол гипертониялық ауру­лардың бас­тапқы сатысында жақ­сы көмек­теседі. Өйт­кені мамандардың болжамын­ша, ги­перто­ния­ның пайда болуына күйзелісті жағдай­лар себепкер болады.