Бесіктің зияны бар ма?

Ата-бабаларымыз жаңа туған сәбиді ұйқысы тыныш әрі таза болсын деп бесікке бөлеген. Ал қазір көп жастар баласын «дәрігер айтты» деп бесікке жатқызбайды. Бесіктің қандай зияны бар?
Рымгүл КЕНЖЕХАНҚЫЗЫ, Шығыс Қазақтан облысы
Сұрағыңыз қазіргі таңда өзекті. Шынымен-ақ, педиатрлар баланы бесікке жатқызуды құптамайды. Алматыдағы № 1 қалалық балалар емханасының педиатры Анабаева Дариға Мәуленқызы былай дейді: «Бесікке жатқан балаға ауа жетпейді. Денесін қымтап орап тастаған соң, сәбидің қаны еркін жүрмейді. Оның үстіне, тұмшалап орап тастаған сәби қатты терлейді. Терлеген соң ол тері ауруларына шалдығады. Терлей берудің соңы рахит ауруына апаруы мүмкін». Сондықтан қазір бала дәрігерлері еркін тыныс алып жататындықтан, сәби төсегін қолдануға кеңес береді.
М.Жұмабаев «Педагогика» атты ғылыми еңбегінде баланы күндіз-түні бесікке жатқызуды қолдамаған. Оның себебі қазақ баласын тұмшалап, орап тастайды. Бесікке дұрыс бөлей алмайды деген. Жұмабаев егер ана балаға зияны тимейтіндей денесін еркін қозғалтып, терлемейтіндей бөлей алатын болса, бесікке бөлеуді теріс көрмеген екен. Мәселе, жас аналардың баланы бесікке дұрыс бөлей білгендігінде.